بيع بيع بيع... الثورة يا بديع

شعار أول مرة أسمعه في مسيرة 6 إبريل امبارح من التحرير إلى مجلس الشعب. الناس شايفة إن تخاذل الاخوان و تواطؤهم مع العسكر ضد رغبات الشعب يعتبر بيع للثورة. و أنا معاهم... في أحداث محمد محمود الاخوان فضلوا الكرسي على الشعب، و في أحداث القصر العيني الاخوان قالوا على ست البنات اللي العسكر عروها "ايه إلي وداها هناك؟". و السيدة/ عزة الجرف، اللي معها معهد خدمة إجتماعية، و الشهيرة بأم أيمن، قالت نبحث عن السجلات الجنائية للشهداء، الاخوان قالوا قبل الثورة الخروج على الحاكم حرام، وإن هما لن يشاركوا في احتجاجات و تظاهرات ٢٥ يناير. بس نزلوا بعد ما الثوار الحقيقيين أنجزوا نصف المهمة يوم ٢٩ يناير ٢٠١١، وفي يوم ٢٥ يناير ٢٠١٢ عندما دعونا إلى مليونية لإستكمال مطالب الثورة.. نزل الاخوان الميدان عشان يحتفلوا.

جانب من تظاهرات أمس. تصوير: م/ ابراهيم الشريف


الناس تحت خط الفقر و احنا حنصرف ملايين عشان نحجب المواقع الإباحية، العيال في المدارس مش بتتعلم و هما بيقولوا زي شرعي للفتيات و منع الإختلاط في المدارس. زي مايكون خلاص مش ناقصنا أي حاجة في الدنيا لنكون في مصاف الدول المتقدمة. خلاص قضينا على كل مشاكلنا و مش ناقصنا ولا مشكلة غير أفلام البورنو و الزي الشرعي. هو في إيه؟ إيه اللي بيحصل فيكي يا بلد؟

الناس لما انتخبت الاخوان، انتخبوهم بفلسفة "الناس دي بتعرف ربنا وأكيد حيراعوا ربنا فينا". بس يا سيدي الاخواني، أحب أقولك إن مراعاة ربنا في الحكم مش قمع وكبت الحريات.  مراعاة  ربنا في الحكم هي انك متنيمش حد جعان في بلد فيها حجم الاستثمارات دي. مراعاة ربنا في الحكم انك متسمحش لصرصار إنه ميحترمش أخوه اللي من دين مختلف في محنته. كل الحاجات دي، خلت الناس تحس إن الاخوان المسلمين باعوا الثورة مقابل الكرسي و السلطة، وعبروا عن ده بهتاف "بيع بيع بيع، الثورة يا بديع" في إشارة إلى د/ محمد بديع، مرشد عام الاخوان المسلمين.


كما وضحت في أول مقال ليا على المدونة، البرلمان فاقد للشرعية، و الشعب ابتدى يوعى لكدة. و كمان الشعب و الحمد لله ابتدى يعرف مين اللي عايز مصلحة مصر بجد، و مين اللي عايز مصلحة الشخصية. 

أنا ادعو كل أعضاء البرلمان للاستقالة منه، و الإستقالة من تأسيسية الدستور وإجراء الانتخابات البرلمانية بعد وضع الدستورعن طريق الفقهاء الدستوريين و السياسيين. و أنا ادعو سياسيين البلد الكبار زي د/ محمد البرادعي و د/ عبد المنعم أبو الفتوح و المستشار هشام البسطويسي و الأستاذ حمدين صباحى تأسيس مكتب رياسي. و تسلم السلطة من المجلس العسكري القائم حالياً بأعمال رئيس الجمهورية.

لا لدستور تحت حكم عسكري... الثورة مستمرة و المجد للشهداء.

لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

  

النظافة حلوة والله

يا سبحانك يا الله.. ماهو يا احنا ناس نظيفة يا احنا ناس مش نظيفة.. أما فكرة بين البينين دي مش موجودة. خير اللهم اجعله خير، في ناس إنهاردة جت تشيل زبالة من مكان أنا كنت متواجد فيه إنهاردة. ف خدتني الحماسة و رحت شلت معهم زبالة و إنشكحت أساريري إن في ناس بتحب تبقى نظيفة و بتحب تبقى منطقتها و بلدها بشكل عام نظيفة برضه .

و لكن اللي فيكم يعرفني بشكل شخصي حيعرف إن أنا في العموم انسان منحوس، و فعلاً، يا فرحة ما تمت خدها الغراب وراح ف ستين داهية... وأنا واقف تحت البيت... حد رمى كيس زبالة من شباك بيتهم. بس النحس مش هنا. النحس ف إن الكيس وقع عليا و اتفتح و نزل إللي فيه كلو على هدومي و على جسمي و مش عايز أقولك بقى.


المهم طلعت بيتنا و روقت نفسي و قعدت أفكر كدة.. يا سبحان الله، نفس الناس إللي كانت بتنظف ميدان التحرير بعد عزل المخلوع هي نفس الناس اللي بترمي في الشارع. و نفس الناس اللي نزلت تبييض الأرصفة هي نفس الناس اللي بتطلع فوق الرصيف بعربيتها وبتكسر الأرصفة.


ماهو أصل حاجة من اتنين، يا إما أنا كنت بحلم إن حصل ثورة وإن الناس فعلاً عملت الكلام ده.. يا إما المصريين عندهم شيزوفرنيا. بعد لما مبارك إتخلع، نزل المنشور بتاع متدفعش رشوة ومترميش في الشارع ومتمشيش عكس و كذا حاجة تانين كدة. فاكرين المنشور ده؟ المنشور ده كان بيقول الكل واحد من فضلك خليك مواطن مثالي وإبدأ بنفسك التطوير.و سبحان الله، لا سحر ولا شعوذة حضرتك، الكلام ده اتعامل فعلاً. لمدة ٣ أيام، كنت تدخل أي حتة تلاقي الناس واقفة طابور. ياااه فاكرين الكلمة دي... طابور. بس طابور اللي هو بتاع أوروبا. اه والله، وافين طابور خط مستقيم، لا حد بيزعق ولا حد بيناهد. و الناس واقفة في الاشارت قبل الخط الأبيض اللي في الارض، العسكري مش بياخد رشوة. الناس كلها ملتزمة وكله تمام. وبقدرة قادر، بعد ٣ أيام بالعدد، ولا كأن كان فيه حاجة. رجعنا تاني زي ما كنا حضرتك.


و قبل بس ما تأخذ حضرتك الجلالة وتقول لي أصل الناس مش حاسة بتغيير عشان كدة بقت سلبية.. أنا عايز اقول لحضرتك إن الإلتزام كان مدته ٣ أيام بالعدد. يعني ملحقناش نبقى بني أدمين ورجعنا تاني. و هنا بقى السؤال بيطرح نفس. أنا ازاي أتعب ف حاجة وفي ثانية إهمال أو لا وعي أو أي حاجة أقوم مدمر الحاجة دي؟ و الاهم من كدة، ليه؟ و الأكثر أهمية هل ممكن مشفش الصورة دي تاني؟ 

في حاجة تانية مثيرة للسخرية جداً. مترو انفاق القاهرة الكبرى. تدخل محطة المترو وتستنى القطار، عادي جداً ييجي المترو، عادي برضه.. اللي بيستخدم المترو هو اللي حيفهمني دلوقتي، في أي عربة مترو، أبواب الخروج هي اللي في أطراف العربية و أبواب الركوب هي البابين في منتصف العربة. المهم، تيجي تركب من باب الركوب تلاقي بتاع ٢٠ واحد نازلين، تيجي تنزل من باب النزول تلاقي ٣٠ واحد حيركبوا. طب ليه؟ ماهو سيادتك لو اتبعت التعليمات، مش حتضيع وقت ولا حتضتر سعادتك انك تمسك الباب لحد. جرب يا سيدي. مش حتخسر حاجة. ولو نفعت، ادعيلي. 


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

عن العلمانية في سطور قليلة جداً... جداً

دائماً تلاقي شيخ في مسجد عمال يقولك العلمانية دي كفر و العلمانيين كفار ويقعد يملى ودنك بكلام ملوش أي علاقة بما هو واقعي. تعالى كدة نعرف إيه هي العلمانية مع بعض.


تعريف العلمانية هو:  تعني اصطلاحاً فصل الدين والمعتقدات الدينية عن السياسة، وقد تعني عدم قيام الحكومة أو الدولة بإجبار أي أحد على اعتناق وتبني معتقد أو دين أو تقليد معين لأسباب ذاتية غير موضوعية.


إذن الفكرة إن أنا مش بقولك البنت متتحجبش ولا  بقولك ، لا سمح الله، اكفر بدينك. أنا بقولك تفادياً المشاكل مع أي اقليات دينية انك ف طريقة إدارة الدولة نجنب الدين . و أنا بقولك دلوقتي الكلام ده ليه؟ تخيل كدة معايا إن واحد مسيحي مثلاً عند مشكلة تتعلق بدينه، هل ححكم الدين الاسلامي فيما يخص المسيحيين؟ طبعاً ده مش منطقي بأي حل من الأحوال.


 و عشان تفهم أكتر وجهة نظري، حط نفسك في مكان الأخر، لو سيادتك مسلم، تخيل نفسك كل حاجة في الدولة بتتحرك بتعاليم الدين البوذي. هل سعادتك حتكون مبسوط؟ معتقدش. هنا بقى العلمانية بتقولك إيه؟ بتقول لسعادتك نحي الدين جانباً من إدارة الدولة، وخلي الدين علاقة خاصة جداً  مابينك ومابين ربك، عامل الناس بالدين، بس متفرضش دينك على حد، ولا تخلي حد يفرض دينه عليك برضه يعني. و خلي الدين بعيد عن تشريعك للقوانين وكتابتك لدستور دولتك، عوضاً عن ذلك و لكي تتفادى النزاع الديني بين طوائف الشعب والتي تعتبر نسيجه، اكتب دستوراً بشرياً خالصاً يعتمد إعتماداً كليا على عادات وقيم بلدك والتي لن يختلف عليها أحداً مسلماً كان أو مسيحياً.. حتى لو كان كافر، حتلاقيه بيقبل العادات و القيم و التقاليد. طالما كان مصرياً. اتقوا الله في مصر، مش ناقصين فتنة طائفية، إللي جاية ممكن تقلب قلبة وحشة أوي... صدقوني.


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

قراءة بسيطة لليومين دول

   .أنا أول مرة في حياتي أدون على النت هي دلوقتي، و يمكن أنا حابب أتكلم مع اللي حيقرأ الكلام بتاعي بلغة الشارع من غير فلسفة ولا مصطلحات معقدة. أنا انتمي إلى حركة ٦ إبريل و افتخر بانتمائي لها، حركة ٦ إبريل شعارها "شباب بيحب مصر بجد" و أنا من قبل ما انتمي للحركة بشوف إن أنا بحب مصر بجد. عشان كدة أنا حابب أنقل وجهة نظر للاحداث الجارية دلوقتي في مصر.

الحدث اللي على سطح الأحداث دلوقتي هو الدستور و القصص بتاعت الدستور والاسلاميين والليبراليين واليساريين والكلام ده كله، بس السؤال الحقيقي، هي فين المشكلة؟ و من هنا بقى نبدأ نتكلم.

من وجهة نظري، الموضوع يطول فيه الكلام و الأخذ والعطاء، المشكلة إن لما إتنبح صوتنا و قعدنا نقول قولوا لأ في الدستور.. تراوحت الأسباب مابين لا لترقيع دستور قديم ولا عشان عايزين دستور جديد من الألف للياء.. بس أنا كنت فلسفتي لما رحت قلت لأ كانت ف إن الدستور المفروض إنو يكون موجود قبل أي إنتخابات العدة أسباب:

١- إن مجلس الشعب غير منوط بيه وضع الدستور. وليه أنا بقول كدة؟ لأن مجلس الشعب طبيعي إن يبقى في أغلبية مسيطرة عليه و على تشريعه للقوانين و كدة والسيطرة دي بتيجي من كذا حتة، مثل الإنتشار في الشارع وكذا حاجة تانية مش مجال الكلام عليها دلوقتي. إذاً ف من غير العادل أن تسيطر تلك الأغلبية أياً كان اسمها ايه على تحديد شكل البلد لمدة ٢٠ سنة قادمة، لذا كان المنطقي أن يتم وضع الدستور عن طريق فقهاء دستوريين قبل إنتخاب مجلس الشعب وقبل أي حاجة. و عشان كدة أنا نزلت في الإستفتاء و قلت لأ.

٢- تكليف مجلس الشعب بإنشاء اللجنة الدستورية غير منطقي بالمرة. غير الاسباب السالف ذكرها، دلوقتي إنت عندك في مصر اقليات دينية وفئوية كتير جداً جداً، ف لما حضرتك تيجي تقولي أنا ٤٨٪ من اللجنة بتاعة الدستور اسلاميين سعادتك كدة اغفلت حق الاقليات دي. بغض النظر عن نسبة المسلمين في مصر كام بالنسبة إلى غير المسلمين.

٣- انك أصلاً لسة ف بلدك النظام القديم -مع تغيير عدد من الوجوه بس- هو السائد و الحاكم، وقيم الثورة كان أساساً الهدم ذلك النظام الفاشي الفاسد.

منن بقى سعادتك بتقولي إن مجلس الشعب هو الجهة الشرعية لكتابة الدستور؟

أما عن أداء مجلس الشعب الحالي، فحدث ولا حرج، ناس قاعدة بتهوهو على بعض، ومش ناقص غير انهم يقلعوا الجزم ويضرب بعض. ناهيك عن ذلك وذاك، مفيش قانون واحد أوحد تم تشريعه. و بس الفالحين فيه، نركب عربيات BMW و يتعملنا مواكب ، غير كدة، مش بنعمل حاجة .

و المجلس العسكري، اه يا مجلس، همه الوحيد و شغله الشغل هو تبرئة حسني مبارك، و الخروج الامن من السلطة، غير كدة ميهموش. و سبحان الله يا أخي، مجلس مناقض لنفسه تماماً يقولك بتوع محمد محمود بلطجية، وبعدها بيومين يقولك حنعالجهم ببلاش ف مستشفيات القوات المسلحة. و من هنا يبدأ الصراع.

الصراع حيبقى مابين ٥ عناصر، و هم:

١- مجلس الشعب
٢- المجلس العسكري
٣- الحركات الثورية
٤- التيارات الإسلامية
٥- الشعب (المقصود هنا الشارع غير المسيس)

أولاً، بما إن مجلس الشعب أصبح واقعاً لا تسطيع إنكاره، و إنتخابه للجنة تأسيسية واقع مرير لا تسطيع تفاديه، مجلس الشعب بيدافع عن شرعيته اللي هو أصلاً مفتقد لها، و الأغلبية الإسلامية داخل المجلس بتحاول إن هي تفرض ايديولجيتها السياسية و الاقتصادية.

ثانياً، تصريح المرشد العام بأن الجماعة لا تختلف على أي من بنود و مواد الدستور القديم بإستثناء الباب الربع و الباب الخامس الخاص بصلاحيات رئيس الجمهورية التي تسعى الجماعة الى تقنينها.

ثالثاً، المجلس العسكري الذي لن يقبل بتقنين صلاحيات الرئيس لصالح مجلس الشعب أو أي جهة أخرى هو تقليل من سلطة المجلس العسكري في حد ذاته، لأنه أيا كان إسم رئيس الجمهورية القادم، فهو سيكون ستار لحكم المجلس العسكري. ومن هنا سيكون أول خلاف بين المجلس العسكري ومجلس الشعب متمثلاً في جماعة الاخوان المسلمين

رابعاً، الحركات الثورية التي اتفقت ألا تتفق. فهي كلها حركة إصلاحية بالأساس فسيكون لها في ذلك الصراع الكلمة الحاسمة في ضم الشعب لها أو للسلطة غير الشرعية.

خامساً، التيارات الاسلامية التي تسعى لتطبيق الشريعة الإسلامية ليس لمبادئها و لكن لتأمين الحرية الاقتصادية لتلك الحركات وذلك عن طريق التستر بعبارة "دي ناس بتاعت ربنا يا عم".

وأخيراً وليس أخرا، الشارع الذي سيظل يلعب دور المشاهد من بعيد. إنتظاراً لما ستسفر عنه تلك الصراعات السياسية المعقدة. و من وجهة نظري أنه من مصلحة الحركات الثورية في مصر إكتساب الشارع دلوقتي قبل بعدين.. ليه؟ عشان الشارع هو اللي حيحسم المعركة، إنحياز الشارع للثوريين رجح كفتهم، لأي حد تاني، حيضعف كفة الثوريين.

الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.

عادل سماقية.