موقفي النهائي من الانتخابات

اقتربت إنتخابات الرئاسة. ، و جه معها وجع الدماغ والقلب حختار مين ومش حختار مين. ووعود من المرشحين بحاجات وهمية وكأن كل المرشحين سحرة أو اللي حيتولى المنصب سيؤمر فيطاع . اللي بيقولك حطبق الشريعة.. و اللي يقولك حغني الفقراء و كله هري. و ناس بدون ذكر أسماء زي أحمد شفيق إتشالت من رئاسة الوزراء بإعتصام 9 مارس و بمنتهى التبجح والصفاقة نزلت إنتخابات رئاسة الجمهورية وناس قامت على النظام الذي كان ينتمي له بعض الناس بثورة برده بدون ذكر أسماء زي عمرو موسى كدة نزلة إنتخابات وناس الشعب مش طايقهم زي الاخوان منزلين واحد استبن بدون ذكر أسماء زي محمد مرسي. ف أنا فعلاً مش فاهم ايه إلي بيحصل بالضبط.


واللي يفقعك بقى إن إلي بيقولوا إن هما مرشحين ثورة مش راضيين يدعموا كلهم واحد بس لتقوية الصف الثوري.. ليه؟ متفهمش. هل حباً في المنصب ولا رؤى مختلفة ولا إيه. عندنا مرشحين الفلول ٣ ، و هم أحمد شفيق، و عمرو موسى ، وأحمد خير الله. أحمد خير الله كدة كدة برة السبق لأن أصلاً محدش يعرفه، يتفضل عندنا عمرو موسى وأحمد شفيق. وأعتقد إن في الحالة دي، مرشح المجلس العسكري المنطقي هو أحمد شفيق لمرجعيته العسكرية ولكونه كان عضواً في المجلس من قبل أثناء قيادته للقوات الجوية وإلى اخره من الكلام اللي أنا واثق انكم كلكم تقدروا تسمعوه زي الشريط. أما السيد عمرو موسى ف هو معارض رمزي الحسني مبارك. عارض بعد من سياسات الحزب الوطني فأقيل من منصبه كوزير لخارجية مبارك في تمثيلية بايخة وماسخة و عين أمين عام جامعة الدول العربية. وقعد يشجب ويندد ويدين طول عمره ولكن بسبب أغنية شعبان عبد الرحيم "أنا بكرة إسرائيل وبحب عمرو موسى" إكتسب موسى بعض الشهرة.


على الجانب الآخر، لدينا المرشحين الثوريين زي د/ عبد المنعم أبو الفتوح، و ده بقى متفهملوش ده اخوان ولا مش اخوان و متفهمش دماغه فيها إيه. بس الحق يقال، البرنامج بتاعه حلو أوي، متوازن ما بين الإهتمام بالإستثمار و بمحاولة تحقيق العادلة الإجتماعية. وعندك مرشح زي حمدين صباحي، مرشح إشتراكي ناصري، مناضل معروف من زمان، من أعضاء الحركة الاشتراكية في الجامعة في السبعينات ومن مؤسسين حزب الكرامة ومن مؤسسين حركة كفاية وعضو مجلس شعب الفترة طويلة وعضو قوي جداً كمان.  و برنامجه باصص بشكل أساسي على تحقيق العادلة الإجتماعية على قد ما يقدر في دولة تفشت فيها الرأسمالية بحماقة وأصبح هدف سكانها هو الربح بأي شكلٍ كان. وعندنا أبو العز الحريري، قائد الحراك العمالي في مصر لأعوام طويلة وكان أحد أعضاء مجلس الشعب برضه المعارضين الأقوياء، ولكنه يفتقد الكاريزما المطلوبة لرئيس الجمهورية. و في المستشار هشام البسطويسي، قاضي وله تاريخ نضالي معروف في الوسط القضائي  بوقفة القضاة من كام سنة المعارضة لنظام مبارك اللي إتدغدغ فيها ضرب مع عدد من القضاة.


وعندنا مرشح الاخوان المتأسلمين الدكتور الاستبن محمد مرسي عضو مكتب الإرشاد وأهم انجازاته على حد تعبيره على قناة CBC إنو اتجوز مراته وبالمناسبة كان فيه وقفة إستعراض عضلات يوم ١٠ مايو ممتدة من عندنا في المعادي لحد شارع القصر العيني كلها إخوة وأخوات شيلين بوسترات الاستبن وبيشيروا بعلامة النصر وكان يومها أحد أعز اصدقائي مراته بتولد في مستشفى في المنيل ف نزلت تحدثت مع ما كان يبدو منسق عمل جماهيري الفاعلية. مش فكر كان اسمه إيه كدة.. ف دار بينه وبيني هذا الحوار.


- مساء الخير.. أنا عادل و كنت عايز حضرتك تكلمني شوية عن برنامج مرسي لرئاسة الجمهورية.


-و عليكم السلام و رحمة الله.. بص يا أستاذ عادل.. برنامج الأستاذ الدكتور محمد مرسي يعتمد أساسا على أفراد المجتمع فالأفراد نواة الأسر و الأسر نواة المجتمع.. و عندما يكون هناك فرد مش قادر يعمل واجبه منلموش.. نلوم المجتمع


-جميل.. و بالنسبة للثورة.. ايه موقفكم منها؟؟


- احنا كنا و لا نزال وسنظل مع الثورة!!


- ازاي يا أخ؟؟ ده يوم 25 يناير المرشد بتاعكو قال انكم مش حتنزلوا و منزلتوش غير يوم 29.. و مشيتوا يوم 5 فبراير الصبح بعد ما قعدتوا مع عمر سليمان يوم الأربعاء. و مشاركتوش في ولا جمعة بعد كدة غير قندهار و مشاركتوش في أي حاجة بعد كدة غير 13 أبريل.


- هذا لم يحدث خالص.. احنا مسبناش الميدان الا يوم 11 فبراير و مقعدناش مع عمر سليمان


- ياااااااااا راجل؟ طب و مهدي عاكف مقالش ان مبارك من أحكم قيادات مصر و انه نفسه يقعد معاه


-بص يا سيد عادل..  احنا لما قعدنا مع عمر سليمان (أنا كنت هنا بلمت طبعا للتناقض) كان همنا الأوحد و الوحيد هو مصلحة الأمة.


-طب بالنسبة لمحمد محمود؟؟


- احنا كدة بنخون بعض..


-لأ يا سيدي الفاضل مش تخوين.. أنا كما ذكرت أنا بسأل بسز


-احنا بنعلي مصلحة الوطن فوق كل شيئ.


-فوق مصلحة أخوك اللي كان بيذبح في الشارع و جثته كانت بتترمي في الزبالة؟


-طب ما احنا كنا بنعتقل ولا حدش كان بيسأل


-اللي كنا بنعرف انه معتقل كنا بننزله... و بعدين أنا مش بتكلم في اعتقال.. أنا بتكلم في قتل


-انت كدة بتخون الجماعة!!


-يا عم هو انت كل  ما تتزنق تقولي كدة؟؟


-أنت مسلم ولا مسيحي؟؟


-أشمعنى؟؟


-عشان أقولك حاجة وفق معرفتك الدينية


-لأ مش ضروري


-المسيح قال  من كان منكم بلا خطية فليرمها أولا بحجر.. و الرسول قال من عفا عند قدرة عفا الله عنه يوم عسرة


-ماشي جميل اللي سعادتك بتقوله بس أنا مش جاي أتكلم في درس دين...


- بس احنا السياسة بالنسبة لنا كلها دين


-تمام


و هنا كان النقاش انتهى.. فمن المستنتج ان الاخوان من وجهة نظرهم مبعوش الثورة و رغم انهم قالوا مثلا في جمعة 13 أبريل "انزلوا من بيوتكم طنطاوي عرى بناتكم" على رغم انه عند وقوع الحادث كان االي بيتقال "هو ايه اللي وداها هناك"


ف الموقف الاخواني مش واضح بالضبط هل هم مع أو ضد الثورة ولا مع مصالحهم بس سواء كانت في الثورة أو في حتة تانية.




ف مش عارف بس دي وجهة نظري في كل المرشحين!!


الانتخابات دلوقتي فاشلة بس تعتبر المكسب الوحيد للثورة مقاطعتها غلط جدا دلوقتي!


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.


الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.


عادل سماقية.

أين السلفيين من أخوهم الجيزاوي؟

مسمعناش صوت كلب على أن أحمد حيتجلد، ولا سمعنا صوت حيوان نطق وقال عايز حق أخويا أحمد الجيزاوي. ولا هي الكلاب بتطلع بس لم تبقى صاحبة المشكلة واحدة ست؟ اوعى تفتكر إن هما كان فارق معهم البنت مسلمة ولا مسيحية ولا حتى بوذية، هما كان فرق معهم انها واحدة ست، أو بالنسبة ليهم، مجرد أنثى. ودول أصلاً شوية مخلوقات مهتاجة جنسياً ولا يفكرون بالعقل بل يفكرون باعضائهم التناسلية، ويربطون شرف الانسان باعضاؤه التناسلية. وحياتهم كلها أعضاء تناسلية.

بيحكموا على البنت محترمة ولا لأ بناءً على هي لابسة ايه... لأن بعض الملابس بتثيرهم جنسياً... وبيعتبروا الختان واجب على كل بنت!!! هو شايف ان الحجاب حاجة كويسة عشان هو انسان محروم مش عايز يشوف حاجة تتعبه!! بس مش باصص للهدف الأسمى للحجاب.

أما بنسبة لقضية أخويا أحمد الجيزاوي.. ف اللي حصل إن هو سب "الذات الملكية" بتاعة آل سعود ف البهوات حكموا عليه بسنة سجن و ٢٠ جلدة غيابياً وقبضوا عليه أثناء اداؤه مناسك العمرة. وطبعاً لأن المصري طول عمره ملوش تمن ف مفيش دكر في السلطة اتحرك عشان يمنع المهزلة دي!! أنا عايز أعرف لحد امتى حنفضل ساكتين على المهازل اللي بتحصل للمصريين دي!! في كل مكان ملناش تمن بسبب ان السلطة مش عمللنا قيمة العالم كله بيلطش.. و ميلطش ليه؟؟ ما هو محدش بيسأل ولا حد بيعمل حاجة!!

ندعوكم لوقفة يوم  يوم الخميس الموافق ٢٦/٤/٢٠١٢ الساعة الخامسة مساء أمام وزارة الخارجية لنجدة أخوكم في الوطن أحمد الجيزاوي. هذه مبادرة ليعلم كلب الذات الحيوانية أن الصوت المصرى عالي جداً. وأن المصري لن يقبل بإهانة أخيه المصري حتى لو لم تتحرك السلطة لنجدته.


عاشت مصر وعاش المصريين بكرامة في كل مكان.




لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.


الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.


عادل سماقية.

ماذا بعد تسليم السلطة؟

"يسقط يسقط حكم العسكر" و" تسليم السلطة فوري" وغيرها هتافات رنانة نهتف بها حماساً في مظاهرتنا وإعتصاماتنا. ولكننا ننسى أو نتناسى دائماً سؤال أهم، وهو "ماذا بعد تسليم السلطة؟". سيادتك أكيد دلوقتي بتقول "هو البني آدم ده بيقول إيه؟ هو فاكر إن المجلس العسكري حيسلم سلطة بجد ولا إيه؟" إجابةً على سؤال حضرتك، أحب أقولك إن المجلس العسكري ايوة حيسلم سلطة، وأيوة حيسلمها لواحد ثوري كمان مش فلة ولا مرشح المجلس العسكري. على فكرة أنا متجننتش، أنا صاحي و واعي و فايق وكله تمام، وأحب أقول لحضرتك كمان إن لو المجلس طال إنو يزور الإنتخابات لأحد المرشحين الثوريين حيعمل كدة. قبل بس متسبلي الدين و تشتمني.. إفهم مني وجهة نظري.


دلوقتي، مين أعلى رتبة في الجيش المصري؟؟ طبعاً سيادتك حتقولي طنطاوي.. بس هو الصحيح يا فندم إن أعلى رتبة في الجيش المصري هي "القائد الاعلى للقوات المسلحة" ودي يا فندم بتبقى محجوزة لرئيس الجمهورية أياً كان إسمه إيه. دلوقتي وبعد ظهور مساوئ المجلس العسكري علناً لكل الناس، وبعد إعلان كل الحركات والائتلافات والأحزاب السياسية الثورية رفضها لمرشحين الفلول، مبقاش قدام العسكر أي حل غير إن مرشح ثوري هو اللي يكسب الانتخابات الرئاسية، و ده إللي حيتم، من وجهة نظري.


بعد فوز المرشح الثوري بالانتخابات وتسلمه السلطة في آخر شهر يونيو.. وبما إن مقاليد الحكم اللي يملكها هو ال-١٩ ضابط أعضاء المجلس العسكري، مع حوالي ٢٠٠٠ رجل أعمال هما اللي بيحددو شكل سياسات البلد بشكل عام، الناس دي لن تساعد رئيس الجمهورية بأي شكل من الأشكال. و حيسيب الرجل لمدة ١٢ شهر في حالة من الانفلات الأمني العارم و إنعدام للإستثمار مما قد يؤدي إلى مجاعة بنهاية العام.


ساعتها بقى يكون في كارثة  و ستمثل "الحل الأخير" للمجلس العسكري و هو اعلان عزل رئيس الجمهورية الثوري المنتخب من منصبه بعد "فشله" في ادارة البلاد من خلال منصبه. من وجهة نظرهم.


و يعود بذلك الحكم العسكري، الجدير بالذكر أنه بعودة الحكم العسكري بعد عام من تسليمه السلطة، سيكون حكماً إستبدادياً بشكل فظيع.و حتبان الفظاعة دي في الاعتقالات التي ستتم في حق الثوار وأعضاء الحركة الثورية و المدونين والنشطاء بشكل عام . ده غير التصفية الجسدية بداخل السجون و خارجها. ووقتها أتخيل المتحدث الرسمي بإسم المجلس العسكري وهو بيقرأ بيان بيقول "السيد عمر سليمان قال لكم إن انتم مش جاهزين للديموقراطية، وسبتم شوية عيال يعملو شوية هبل وقال سموها ثورة".


الصعب بقى إن اللي حيفضل من الثوار برة السجون أو من سيكتشف إن الثوار كانو صح وسيتحول إلى ثائر سيكون عليه عبء قاتل وهو إقناع أن ما يقوله المجلس العسكري وقتها ده عبث أو كذب، لأن الناس حتبقى جربت الديموقراطية واكتشفت فشلها بسبب ما سلف ذكره، وقد يواجه بالضرب والسب. أو ما هو أقصى وألعن.


وتعود بذلك دولة مبارك والعسكر ل-٦٠ سنة تانيين. ونتقابل الثورة الجاية لو كان لينا عمر



لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.


الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.


عادل سماقية.

مخطط 6 ابريل لحرق البلد

هاهاها... وقعت يا شاطر... ومايقع إلا خيرت الشاطر... إحم إحم... قصدي الشاطر. أنا نفسي أفهم... هو الاخوان المسلمين عايزين إيه؟؟ قالك في الاول ٣٠% من كراسي البرلمان.. تصحى الصبح تلاقي ٤٧٪ ومع السلفيين ٧٥٪. أيام إعتصام ال-١8 يوم، لا تفاوض مع السلطة.. تصحى الصبح تلاقي مكتب الإرشاد قاعد مع عمر سليمان. يقولك لن يترشح أي من أعضاء الجماعة أو الحزب للرئاسة. و تفاجأ بالأخ خيرت الشاطر مرشح للرئاسة. و بعدين إيه كمية الدعاية للمرشحين الاسلاميين دي؟ إيه كمية الفلوس اللي بتتدفع دي؟! أنا مذهول!


أعتقد إن بوسترات حازم أبو اسماعيل تكلفت الملايين.. تخيل كانت تجيب عيش لكام مواطن وتجوز كام شاب؟؟ يعني ربنا قال إن الناس متكنش مسرفة في أي حاجة.. أعتقد إن حرام كم الفلوس ده يبقى في الزبالة كدة!! وبعدين حد حس إن في استماتة غير طبيعية على كرسي الرئاسة؟ يا جماعة إفهموا منصب رئيس الجمهورية مبقاش روش زي زمان... ده بقى بهدلة والله. اشي إحاطة لمجلس الشعب بقى على إقرار موازنات و خطب وقرف. بعدين انتو مفيش حاجة مخدتوهاش سيبو حاجة للتيارات اليسارية و الليبرالية.


وبعدين زي ما قلت من شهر تقريباً... فين أداء مجلس الشعب عشان انتخب الأغلبية البرلمانية في رئاسة الجمهورية. ماهو يا الغي عقلي و انتخب حركة برجماتية تسعى لتحقيق مكاسب تنسب إليها بس وتأمين حرية إقتصادية لنفسها مع قليل من الثيوقراطية والحديث بإسم الدين وبصراحة أنا ساعتها ححس اني ضيعت صوتي هدر... أو انتخب من أرى أن لديه فكر إصلاحي حقيقي.


و بما اننا دخلنا ف موضوع الإصلاح ده... أنا شايف ان الإصلاح أصلاً لا يصلح... المجتمع يحتاج إلى هدمه وإعادة بناؤه من الأول خالص.. إن الفساد والإفساد بييجي أو بيتولد من ومع المواطن في سنوات عمره الأولى... وبيبان ده أوي في إن الأهل بيقولوا لولادهم متلعبش مع فلان ده مسيحي أو مسلم(حسب المعتقد بتاع الأهل) أو الغش في الامتحانات مثلاً. وحاجات تانية كتير فالمجتمع من وجهة نظري لا يحتاج إلى الاصلاح بل يحتاج إلى الهدم وإعادة بناؤه من أول وجديد.


للاسف التيارات اليمينية المحافظة زي الاخوان المسلمين والسلفيين لا تتبنى هذا المنطق بل تسعى للتغيير البطيء في المجتمع و ده طبعاً ماينفعش.. لأن الراديكالية مطلوبة أكثر دلوقتي. ففكرة اني انتخب اخوان دي صعبة أوي.. أما عن الإصلاح بقى.. الاخوان لما نزل جمعة ١٣ إبريل هل نزلوا عشان البوتاجاز والبنزين والعيش ولا نزلوا يقولوا احنا كتير وبنعرف نحشد؟؟ بالصدفة أنا كنت موجود إنهردة في مركز الأندلس وشايف اوتوبيسات بني سويف والمنوفية اللي الاخوان حشدوهم للتحرير.


وعموماً خيرت الشاطر طلع من سباق رئاسة الجمهورية و مبقاش يتقلق منه... لا هو ولا حازم أبو اسماعيل.. الأهم من خروجهم مع عمر سليمان هو انك تختار الايديولجية اللي إنت فعلاً تنتمي ليها أو معجب بيها... متديش صوتك لواحد عشان كان أيام مبارك موجود وأيام ما كان في وهم الإستقرار.. ولا أبداً تتخيل إن في مرشح بيمثل السلطة الإلهية.


إدي صوتك لمن يستحقه.


على فكرة العنوان مخادع و محطوط للفت الانتباه


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

بيع بيع بيع... الثورة يا بديع

شعار أول مرة أسمعه في مسيرة 6 إبريل امبارح من التحرير إلى مجلس الشعب. الناس شايفة إن تخاذل الاخوان و تواطؤهم مع العسكر ضد رغبات الشعب يعتبر بيع للثورة. و أنا معاهم... في أحداث محمد محمود الاخوان فضلوا الكرسي على الشعب، و في أحداث القصر العيني الاخوان قالوا على ست البنات اللي العسكر عروها "ايه إلي وداها هناك؟". و السيدة/ عزة الجرف، اللي معها معهد خدمة إجتماعية، و الشهيرة بأم أيمن، قالت نبحث عن السجلات الجنائية للشهداء، الاخوان قالوا قبل الثورة الخروج على الحاكم حرام، وإن هما لن يشاركوا في احتجاجات و تظاهرات ٢٥ يناير. بس نزلوا بعد ما الثوار الحقيقيين أنجزوا نصف المهمة يوم ٢٩ يناير ٢٠١١، وفي يوم ٢٥ يناير ٢٠١٢ عندما دعونا إلى مليونية لإستكمال مطالب الثورة.. نزل الاخوان الميدان عشان يحتفلوا.

جانب من تظاهرات أمس. تصوير: م/ ابراهيم الشريف


الناس تحت خط الفقر و احنا حنصرف ملايين عشان نحجب المواقع الإباحية، العيال في المدارس مش بتتعلم و هما بيقولوا زي شرعي للفتيات و منع الإختلاط في المدارس. زي مايكون خلاص مش ناقصنا أي حاجة في الدنيا لنكون في مصاف الدول المتقدمة. خلاص قضينا على كل مشاكلنا و مش ناقصنا ولا مشكلة غير أفلام البورنو و الزي الشرعي. هو في إيه؟ إيه اللي بيحصل فيكي يا بلد؟

الناس لما انتخبت الاخوان، انتخبوهم بفلسفة "الناس دي بتعرف ربنا وأكيد حيراعوا ربنا فينا". بس يا سيدي الاخواني، أحب أقولك إن مراعاة ربنا في الحكم مش قمع وكبت الحريات.  مراعاة  ربنا في الحكم هي انك متنيمش حد جعان في بلد فيها حجم الاستثمارات دي. مراعاة ربنا في الحكم انك متسمحش لصرصار إنه ميحترمش أخوه اللي من دين مختلف في محنته. كل الحاجات دي، خلت الناس تحس إن الاخوان المسلمين باعوا الثورة مقابل الكرسي و السلطة، وعبروا عن ده بهتاف "بيع بيع بيع، الثورة يا بديع" في إشارة إلى د/ محمد بديع، مرشد عام الاخوان المسلمين.


كما وضحت في أول مقال ليا على المدونة، البرلمان فاقد للشرعية، و الشعب ابتدى يوعى لكدة. و كمان الشعب و الحمد لله ابتدى يعرف مين اللي عايز مصلحة مصر بجد، و مين اللي عايز مصلحة الشخصية. 

أنا ادعو كل أعضاء البرلمان للاستقالة منه، و الإستقالة من تأسيسية الدستور وإجراء الانتخابات البرلمانية بعد وضع الدستورعن طريق الفقهاء الدستوريين و السياسيين. و أنا ادعو سياسيين البلد الكبار زي د/ محمد البرادعي و د/ عبد المنعم أبو الفتوح و المستشار هشام البسطويسي و الأستاذ حمدين صباحى تأسيس مكتب رياسي. و تسلم السلطة من المجلس العسكري القائم حالياً بأعمال رئيس الجمهورية.

لا لدستور تحت حكم عسكري... الثورة مستمرة و المجد للشهداء.

لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

  

النظافة حلوة والله

يا سبحانك يا الله.. ماهو يا احنا ناس نظيفة يا احنا ناس مش نظيفة.. أما فكرة بين البينين دي مش موجودة. خير اللهم اجعله خير، في ناس إنهاردة جت تشيل زبالة من مكان أنا كنت متواجد فيه إنهاردة. ف خدتني الحماسة و رحت شلت معهم زبالة و إنشكحت أساريري إن في ناس بتحب تبقى نظيفة و بتحب تبقى منطقتها و بلدها بشكل عام نظيفة برضه .

و لكن اللي فيكم يعرفني بشكل شخصي حيعرف إن أنا في العموم انسان منحوس، و فعلاً، يا فرحة ما تمت خدها الغراب وراح ف ستين داهية... وأنا واقف تحت البيت... حد رمى كيس زبالة من شباك بيتهم. بس النحس مش هنا. النحس ف إن الكيس وقع عليا و اتفتح و نزل إللي فيه كلو على هدومي و على جسمي و مش عايز أقولك بقى.


المهم طلعت بيتنا و روقت نفسي و قعدت أفكر كدة.. يا سبحان الله، نفس الناس إللي كانت بتنظف ميدان التحرير بعد عزل المخلوع هي نفس الناس اللي بترمي في الشارع. و نفس الناس اللي نزلت تبييض الأرصفة هي نفس الناس اللي بتطلع فوق الرصيف بعربيتها وبتكسر الأرصفة.


ماهو أصل حاجة من اتنين، يا إما أنا كنت بحلم إن حصل ثورة وإن الناس فعلاً عملت الكلام ده.. يا إما المصريين عندهم شيزوفرنيا. بعد لما مبارك إتخلع، نزل المنشور بتاع متدفعش رشوة ومترميش في الشارع ومتمشيش عكس و كذا حاجة تانين كدة. فاكرين المنشور ده؟ المنشور ده كان بيقول الكل واحد من فضلك خليك مواطن مثالي وإبدأ بنفسك التطوير.و سبحان الله، لا سحر ولا شعوذة حضرتك، الكلام ده اتعامل فعلاً. لمدة ٣ أيام، كنت تدخل أي حتة تلاقي الناس واقفة طابور. ياااه فاكرين الكلمة دي... طابور. بس طابور اللي هو بتاع أوروبا. اه والله، وافين طابور خط مستقيم، لا حد بيزعق ولا حد بيناهد. و الناس واقفة في الاشارت قبل الخط الأبيض اللي في الارض، العسكري مش بياخد رشوة. الناس كلها ملتزمة وكله تمام. وبقدرة قادر، بعد ٣ أيام بالعدد، ولا كأن كان فيه حاجة. رجعنا تاني زي ما كنا حضرتك.


و قبل بس ما تأخذ حضرتك الجلالة وتقول لي أصل الناس مش حاسة بتغيير عشان كدة بقت سلبية.. أنا عايز اقول لحضرتك إن الإلتزام كان مدته ٣ أيام بالعدد. يعني ملحقناش نبقى بني أدمين ورجعنا تاني. و هنا بقى السؤال بيطرح نفس. أنا ازاي أتعب ف حاجة وفي ثانية إهمال أو لا وعي أو أي حاجة أقوم مدمر الحاجة دي؟ و الاهم من كدة، ليه؟ و الأكثر أهمية هل ممكن مشفش الصورة دي تاني؟ 

في حاجة تانية مثيرة للسخرية جداً. مترو انفاق القاهرة الكبرى. تدخل محطة المترو وتستنى القطار، عادي جداً ييجي المترو، عادي برضه.. اللي بيستخدم المترو هو اللي حيفهمني دلوقتي، في أي عربة مترو، أبواب الخروج هي اللي في أطراف العربية و أبواب الركوب هي البابين في منتصف العربة. المهم، تيجي تركب من باب الركوب تلاقي بتاع ٢٠ واحد نازلين، تيجي تنزل من باب النزول تلاقي ٣٠ واحد حيركبوا. طب ليه؟ ماهو سيادتك لو اتبعت التعليمات، مش حتضيع وقت ولا حتضتر سعادتك انك تمسك الباب لحد. جرب يا سيدي. مش حتخسر حاجة. ولو نفعت، ادعيلي. 


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.

عن العلمانية في سطور قليلة جداً... جداً

دائماً تلاقي شيخ في مسجد عمال يقولك العلمانية دي كفر و العلمانيين كفار ويقعد يملى ودنك بكلام ملوش أي علاقة بما هو واقعي. تعالى كدة نعرف إيه هي العلمانية مع بعض.


تعريف العلمانية هو:  تعني اصطلاحاً فصل الدين والمعتقدات الدينية عن السياسة، وقد تعني عدم قيام الحكومة أو الدولة بإجبار أي أحد على اعتناق وتبني معتقد أو دين أو تقليد معين لأسباب ذاتية غير موضوعية.


إذن الفكرة إن أنا مش بقولك البنت متتحجبش ولا  بقولك ، لا سمح الله، اكفر بدينك. أنا بقولك تفادياً المشاكل مع أي اقليات دينية انك ف طريقة إدارة الدولة نجنب الدين . و أنا بقولك دلوقتي الكلام ده ليه؟ تخيل كدة معايا إن واحد مسيحي مثلاً عند مشكلة تتعلق بدينه، هل ححكم الدين الاسلامي فيما يخص المسيحيين؟ طبعاً ده مش منطقي بأي حل من الأحوال.


 و عشان تفهم أكتر وجهة نظري، حط نفسك في مكان الأخر، لو سيادتك مسلم، تخيل نفسك كل حاجة في الدولة بتتحرك بتعاليم الدين البوذي. هل سعادتك حتكون مبسوط؟ معتقدش. هنا بقى العلمانية بتقولك إيه؟ بتقول لسعادتك نحي الدين جانباً من إدارة الدولة، وخلي الدين علاقة خاصة جداً  مابينك ومابين ربك، عامل الناس بالدين، بس متفرضش دينك على حد، ولا تخلي حد يفرض دينه عليك برضه يعني. و خلي الدين بعيد عن تشريعك للقوانين وكتابتك لدستور دولتك، عوضاً عن ذلك و لكي تتفادى النزاع الديني بين طوائف الشعب والتي تعتبر نسيجه، اكتب دستوراً بشرياً خالصاً يعتمد إعتماداً كليا على عادات وقيم بلدك والتي لن يختلف عليها أحداً مسلماً كان أو مسيحياً.. حتى لو كان كافر، حتلاقيه بيقبل العادات و القيم و التقاليد. طالما كان مصرياً. اتقوا الله في مصر، مش ناقصين فتنة طائفية، إللي جاية ممكن تقلب قلبة وحشة أوي... صدقوني.


لو عندك أي سؤال أو شتيمة اكاونت تويتر بتاعي: @adel6april
أو ابعتلي ايميل على: a_samakia@live.com
أو كلمني على فيسبوك بنفس الايميل.



الكلام ده بيعبر عن وجهة نظري الشخصية ولا يعبر عن وجهة نظر أي كيان أنتمي له.



عادل سماقية.